مدينتي غزة

0
533

وصلني مقال ن احياء مدينة غزه لا اعلم من كتبه ولكني اعجبت به كثيرا واعادني الى جماليات مدينة غزه الجميله القديمه التي لا اذكر منها الا القليل ولم يتبقى منها الا القليل والذكريات انشره كما وصلني ما اجملك يامدينتنا غزه وما احلى كل ذكرك .

كتبت بشهر يناير-2006

 

وبدى ابدا من شرقا واغرب…

 

السجاعية

اذا راح نبدا حكى عن السجاعية مش راح نخلص حكى

لأنوا مين فينا ما سمع عن شمشون ودليلا؟

ومين فينا ما بعرف ضريح شمشمون؟

ومين منا ما بعرف العواميد ؟ لا تقولولى مش عارفين العواميد((هاى العواميد تبعت القصر اللى الفلسطينية سجنوا فى شمشون اليهودى ولما طول شعروا قام هدوا على اللى فى ..وقال جملتوا الخالدة =على وعلى اعدائى=))

واكيد كتير منا بعرف شو سوا الأغراب اللى حكمونا باسم العروبة واللى دمروا معالم العواميد ووزعوها وفرفطوها على مدارس غزتنا مدرسة مدرسة ,قال مشان يعملوها مصاطب يقعدوا عليها التلاميذ..وطبعا راح معلم اساسى من معالمنا التاريخية ..ويمكن كتير منا يا اخوان نسى اشى اسموا منطقة العواميد…واللى مش عارف..يسأل الكبار..اكيد بذكروا وراح يحكولوا قصة العواميد..

 

على كل: بتضل السجاعية بأحيائها التركمان والجديدة وبتلتها الرابضة كالأسد =تلة المنطار=بتضل منبع الشجعان والأقوياء واكيد اسمها ما طلع من الهوى سجاعية لا لأنوا كل زلمة فيها شجاع ورجل ..وكل طفل فيها قادر على الصمود..

 

فكل التحية بل اكثر وكل الحب بل اكثر..للسجاعية…وزى ما قلت الحكى ما بخلص عن السجاعية..بس لازم نكمل حكينا عن كل منطقة من غزتنا…

 

الدرج يعنى شمال الغرب من السجاعية

 

غزة الدرج بضريح السيد هاشم جد الرسول

غزة الدرج بقلعة نابليون اللى كانت قصر الباشا زمن الخلافة العثمانية واللى صارت مدرسة الزهرة بعد هيك..

غزة الدرج اللى كان الدرج اللى كمان دمروا معالموا اخوانا العرب باسم العروبة وضيعوا معلم من معالم مدينتنا..بس ضل اسم الدرج مع انوا بمحل الدرج وعند منطقة الفواخير صار شارع اسموا شارع الوحدة..

كمان اللى ما بعرف قصة الدرج يسأل الكبار ..واكيد راح يحكولوا القصة..

 

فالف تحية محبة لأهل الدرج..اللى ضلوا صامدين حتى ولو بدون الدرج

 

بنضلنا مغربين عن السجاعية بس هاى المرة غرب الوسط لوسط مدينتي

 

الزيتون وحى بنى عامر

غزة الزيتون بشارع عمر المختار اللى قاسم البلد من اولها لآخرها نصين..

غزة الزيتون بخان الزيت

غزة الزيتون -بنى عامر-وبالجامع العمرى او الجامع الكبير اللى كان يا ماكان فى قديم الزمان قصر للملكة هيلانا..

وغزة الزيتون بحمام السمرة هادى الحمام التركى الوحيد اللى صمد وضل يحمل تراث وتاريخ

غزة الزيتون بكنيسة الروم وكنيسة اللاتين

غزة الزيتون بجامع الشمعه وجامع كاتب ولاية..تاريخ وما اروع تاريخنا يا اخوان

غزة الزيتون القديمة..بس هل يا ترى ضلت قديمة ؟؟؟

يمكن ضايل سوق القيصرية =اللى هوا سوق الدهب هلقيت=نحمد الله انوا لسة ضايل اشى من تاريخنا وباقى اشى تفتخر فيه مدينتنا=.

بس الأهم عندى اشياء باقية من جدودى القدام هناك..بتذكرنى كل يوم انى لازم احب غزة اكتر..ولازم انتمائى لغزة يضل اكبر واكبر..

 

والله انوا غزة بتجنن بس مين اللى يقدر؟؟؟؟

 

انسيت اشمل على التفاح…لا تواخذونى يا اخوان..

مين ما بعرف حى التفاح..اكيد ما حدا بنسى شجرة السدرة اللى صمدت بنص الطريق لا حدا خلعها ولا حدا راح يعرف يخلعها باذن الله؟!

واكيد ما حدا بنسى مدرسة يافا ..وبركة المية اللى بتطوف كل شتا…واكيد واكيد..

 

واذا غربنا على الوسط..بنوصل للصبرة..ودار جدى الله يرحموا ويشفعلوا ويرحم كل اموات المسلمين ويرحمنا جميعا …

قولوا اميييييييييييييييين!

الصبرة …مش اكتر من انى اقول انوا الصبر صبر ..والصبر يا اخوان ما قدر يصبر زى ما صبروا اهل الصبرة..وخمسطعشر سنة فاتوا بشهدوا على صبرنا ..ويا صبر ايوب صبرنا….وراح نصبر وضايلين للصبر مفتاح..

 

وبديش انسا عسقولة وساحة فلسطين -قلب غزة -وسوق فراس و بناية بلديتها,,واكتر..بس خلينى اكمل حدودنا..

 

اذا غربنا كمان بنوصل للرمال…

ايش بدى اقول يا رمال.. مش هدول بكفوا؟

لا والله ما بكفوا..الرمال الجندى المجهول..والرمال شارع عمر المختار والرمال الجامعات والمؤسسات والمرجعيات والنقابات والادارات ومش بس هيك حدا بنسى مستشفى الشفا…

 

ومن شمال الرمال النصر..ومن جنوب الرمال الشيخ عجلين

 

وآخر الغرب..مخيم الشاطىء..اللى فى اولادنا اللى اتهجروا ممن قضاء غزة..والتجئوا عنا بكل الحب والود والترحيب..

 

حقلنا نعشق هالبلد..مش بحقلنا نبوس ترابها…مش بحقلنا نموت وبالدم نضحى ..وبالروح تفدى ..والعرق نصب مشان تضل  بلدنا….((بحقلنا والا لا؟؟))والله غير الخسيس اللى بقول ما بحقلنا..

 

هاى غزة اللى انولدنا فيها وحفيت رجيلنا بحواريها وبشوارعها..شارع شارع وحارة حارة..

 

هاى غزة اللى هزمت كل عدو وما انهزمت..وطردت كل غريب اوضلت..من زمن …الانجليزى والفرنسى والاسرائيلى..هاى غزة فخرنا وعزنا ..

 

اللى رحبت باولاد فلسطين اللى اتهجروا من العدوان ومن النكبة ومن النكسة ومن الظلم…اللى حبت كل فلسطين ..واحتوت كل فلسطين ..واللى اولادها ما بخلوا لفلسطين بالدم وبالعرق وبالروح ..هاى هى  بلدنا

 

تبقين يا غزة …عنقاء لا تختفين …تحترق الدنيا وانت تعودين

 

يافعة كزهرة ربيعية حمراء..لك الحب ..وقلبك حب …

 

هى غزة بأس شديد…..دافئة مع كل حبيب..

 

تبقى امامها شافعى..وعزيزها هاشمى ..وتاجها عمرى…

 

رايتك خفاقة تعلو ا للسماء..باقية و نحن لك الاوفياء

 

15-01-2006