شفتو شوية صلحه ضوت غزه 24 ساعه

0
183


كتب هشام ساق الله – اهل غزه سعداء بنتفة المصالحه الي تمت بين حكومتي غزه والضفه الغربيه وبتوريد مبلغ 2 مليون شكيل الى موازنه رام الله وعلى الفور وصل الديزل على كرم ابوسالم وانحلت جزء من المشكله واشتغلت المحطه وضوت غزه .

الحمد لله صرنا نطرع كهرباء ومبسوطين الي خاطر اروح ابلغ على اقرب محطه كهرباء ياعمي كنكم غلطانين ولا لا كثير هيك من امس لليوم لم تقطع الكهرباء ولو دقيقه فرجوها على الناس الله يفرج عليكم انتو الاثنين وفكونا من المماحكه والخلاف الله استجاب لدعاء الكهرباء وتحقق حلم كل اهالي غزه .

الناس حاسده حالها وبتحكي جهارا نهارا الله يديمها من نعمه ويحفظها من الزوال ويزيل كل الخلافات على الاقل عشان نضوي ونشوف الدنيا ونبطل نتدقم بالطريق والناس تتحرك بسهوله وهناك اصدقاء يحتفلوا بمجيء الكهرباء على مدار الساعه حتى ولو ليوم ويخزنوا بالبكس الي عندهم بالدور والناس تزاورت وحددت مواعيد لبكره وبعده على امل ان تستمر هذه النعمه حتى ينتهي الديزل تاع المحطه يمكن ديزل اليهود بيطول اكثر لانه سعره غالي .

كثيرون من الاصدقاء يمارسون هوايتهم بتفقد مزارعهم على الفيس بوك وحلب البقر وكذلك قص شعر الخراف وزرع المزرعه وجني ثمارها وتسجيل نقاط كثير تضررت مزارعهم الوهميه ياخساره من جراء هذا الانقطاع الطويل للتيار الكهربائي وكمان ناس تقرا مدونتي مشاغبات سياسيه فقد تضرر عدد الزوار كثيرا .

النسوان عجنوا وطبخوا وخبزوا وتحمموا هم وازواجهم وكل الاولاد وكذلك غسلوا الغسيلات والبعض فكوا الستاير واخرين غسلوا الالحفه حفلة غسيل واستخدام التيار الكهربائي طوال اليوم والبعض تجرا وشغل المكيف حتى يتم تجربته استعداد لوصول الديزل القطري المنتظر الي حيحل المشكله والازمه شهرين على الاقل لحين انتهاء المرحله الاولى من زيادة الكهرباء الداخله الى قطاع غزه .

ياه ما احلى الكهرباء وهي جايه بدناش باختصار كل شيء وخلو الكهرباء جايه ايش بدنا بخلافاتكم ومشاكلكم وملاينك وتصريحاتكم السياسيه الى بتغنيش من جوع بدنا الكهرباء تيجي والله يارب يفرجها ونبطل نشم ريحة السيرج الي بدات رائحته تفوح وخاصه وانت تقترب من السيارات العموميه والتي تنقل الى مسافات طويله .

كل ما اقرب من سياره من هالنوع بشم ريحة فلافل وقلي طول الطريق علنا نتخلص من هذه الرائحه التي خربت زمان السيارات وحكى الاطباء عن انها مضره بالبيئه وتؤدي الى انتشار امراض كثيره رغم ان اخرين تحدثوا عن ابداع الشعب الفلسطيني وقدراته بالتكيف بكل المناخات والظروف والاوضاع .

الله ينصر الي اتفقوا وضولنا البلد والله يديم هالنعمه ويبعد عنهم اولاد الحرام ويوحد كلمتهم بس بموضوع الكهرباء وانشاء الله مايطلع بكره واحد ويقول انه بكره سيتم طفي المحطه لعدم انتظام الديزل من معبر كرم ابوسالم الصديق الذي ياتينا منه النور والكهرباء والله يارب يزيد مخزون الديزل يوم بعد يوم حتى ننتهي من 6 ساعات الكهرباء وانقطاعها 12 ويتم تعديل الامر لما كان عليه بالسابق انقطاع التيار 8 ساعات يوميا ويوم بخشيش طول النهار منوره .

ابسطو ياناس وظبطوا حالكم بكره الامور داحله وكل شيء على مايرام والكهرباء منوره اضو الضواو ليل نهار الفاتوره ستاتي كما هي بدون أي تعديل عاليه عاليه المهم انه الكهرباء تيجي يبدو انوا الي بيفحصون العددات يقدروا الارقام جزافا وبدون قراءه للعدادات .